اسبوع في باريس
اليوم الأول 4 من شهر أغسطس
بعد ٥ سنين من اخر زياره لي لباريس جاتني فرصه اني اسافر لها اسبوع بالرغم من اخر مره رحت لها حسيت انها ممله بس هالمره قررت اسوي بحث و اروح اماكن جديده و ما تكون رحلتي عشوائية قد ما اقدر والأهم بلاد جديده يعني بضاعه جديده
سافرت يوم الخميس الى باريس و الرحله استمرت مابين ٦ ساعات ونص الى ٧ ساعات تقريبا عبر الخطوط الجوية القطريه
من المهم ان يكون عندكم فيزا شنقن و جوازكم صالح لمدة ٦ شهور عالأقل
هذي الصوره الوحده اللي صورتها بالمطار
اجرائتهم سهله وكلهم حليوين بالمطار
بس موظف واحد كان مخيس و اول ما وصلت كان اسلوبه تعبان
و طبعا لأني شوي اخاف من اني اخذ تاكسي من المطارات لأن احنا سياح فأكيد بيزيد بالسعر قررت
احجز سيارة عبر موقع
www.taxi2airport.com
وتختارون السياره اللي حابينها و تدفعون اون لاين
و بيوصلكم ايميل فيه تأكيد الحجز و بعدها بيوصلكم ايميل ثاني فيه اسم الشخص اللي بيستقبلكم و رقم جواله و سيارته و رقمها و وين بتقابلونه
للاسف طيارتنا تأخرت شوي فبلغته بالواتس اب و لما وصلت تأخرت اجراءات الدخول و كنت اول بأول ابلغه لان كنت خايفه يروح عني بس اشوه لما طلعت كان موجود وما راح
و صورت له هالصوره و على طول جا بنفس المكان و رحب فيني و خذ اغراضي عالسياره
و انطلقت الى قلب باريس
كنت حاجزه بفندق الماريوت فرع الشانزليزيه
موقعه جدا ممتاز و جنبه سيفورا و جمعيه منوبري و مطاعم و محلات و طبعا بقلب الشانزليزيه
اللوبي فيه ثماثيل غريبه مثل هالتمثال
و هاي ضيافتهم وقت التشيك ان
و جنب فندق الماريوت كلاريج للشقق الفندقيه
طبعا ٨ ايام في الماريوت كانت بحوالي ٩٠٠٠ ريال و شوي لأن كان عندي خصم و مسجله في ابلكيشن فنادق الماريوت فيكون لي خصم اضافي اما في كلاريج كانت حوالي ١٤ الف ريال
و هاي اسم الشقق الفندقيه اذا حابين تطلعون عليها و هالصور من تصويري
Fraser Suites Le Claridge Champs-Elysées
بالنسبه للماريوت الفندق يمشي حاله و تم تجديده اخر مره سنة ٢٠٠٩ يعني صراحه المفروض يكون ٤ نجوم عشان اثاثه القديم و ابوابه اللي تحسسكم انكم بالثمانينات بس يفي بالغرض و اهم شي عندي مكان قريب من كل شي و بشارع حيوي بس حبيت ترحيبهم و تعاملهم
هاي رسالة ترحيب من الفندق بخط اليد
بالنسبة لي وايد اقدر الكتابات اللي تكون بخط اليد
ضيافة الفندق بالغرفه
اول يوم
بعد ما حطيت اغراضي و تجهزت طلعت
اول مكان رحته اقرب مطعم لأن بصراحة كنت يوعانه
و اقرب مطعم حول الفندق كان مطعم باكستاني الاكل عنده حلو بس ديكوراته تعبانه بس ماشاءالله صامد من ٢٠١٤ لين اليوم لان اذكر كلت فيه من قبل
طلبت لي برياني ربيان طبعا كأنه مجبوس بس المهم ما كان سيء
و عقب ما ترست كرشوتي قررت اروح الى برج ايفل و اتمشى عشان اهضم شوي
طلبت لي سياره توصلني الى برج ايفل عشان اتمشى شوي عبر تطبيق اوبر
بالنسبة لي أحب تطبيق أوبر و اعتبره امن و مريح لعدة أسباب و أهمها
السيارة بعداد
اقدر اطلب سياره حسب الأشخاص اللي وياي
اذا حبيت اكشخ عندهم سيارات كشخه اقدر اطلبها
ما احاتي الدفع لأني رابطه البطاقة الائتمانية مع اوبر ف كل اللي اسوية اني اركب السيارة و يوصلني و انزل ما احاتي خردة و لا دفع
في الابلكيشن موجود خرية الطريج يعني ما احاتي ان بيبوقني هههههههه
طبعا انا استعملت البرنامج في دول وايد و ما قد صارلي موقف الا مره وحده في لندن و اشتكيت عالسايق و ردو فلوسي و أتوقع وقفوه
المهم هاي الصورة وانا كنت في اوبر رايحة لبرج ايفل
وصلت و المكان كان زحمه بس الجو كان وايد حلو و يمكن هالشي نساني الزحمه وبالذات ان جايه من مكان جوه حار
اول شي تفاجأت بكمية التكاتك (توك توك) الموجودين في باريس حسيت روحي في بانكوك
و في طريقنا الى برج ايفل شفنا هالفنان عور قلبي لأنه فاقد يده
و اتجهنا الى ايفل
في البداية
تميت اتمشى صوب نهر السين
و لفت اتباهي هالقفول الله يسلمكم تقول الاسطوره ان اذا كتبتي اسمج و اسم شخص تحبينه و قفلتي عليه تتمون تحبون بعض على طول و لازم بعر ماتقفلين عليه تقطين المفتاح بنهر السين عشان خلاص يحبون حب ابدي و انا أقول انهم خراطين ليش ان الحين كل القفول صينيه انتو تشترون و تكتبون عليهم و عقب يجي البياع و يفك القفل و يمسح الحروف و يرد يبيعه ههههههه
هاي انا بس خشيت ويهي لأني مو مستعده الناس تطالعني وين ما اروح ههههه
و انا اتمشى شفت الناس تشرب من هالسلاش الأزرق و دش بخاطري
وهذا كشكهم و يا زين غراشهم كيوته
و هاي مشروبي لايفوتكم جي حلو و فيه لذعة حامضه شوي
هالمكان قريب ايفل وايد حلو و فيه نوافير
عاد تصدقون الشمس تغرب عندهم الساعه 9 ونص بالليل !
محاولة احتراف بالتصوير
و طبعا بعد هاللفه رديت صوب الفندق و مريت مونوبري عن خاطري اشوف شعندهم ماعندهم قبل ما انام
